May yara sang sobra sa 1,000 ka tawo nga gin-imbitar nanday Taylor Swift kag Travis Kelce para sa ila palaabuton nga kasal.
Suno sa mga report, natalana nga himuon ang grandyoso nga seremonya sa Madison Square Garden sa New York City sa madason nga Hulyo 3.
Ginapaabot nga matambungan ini sang ila mga pamilya, malapit nga mga abyan, mga kilala nga personalidad, kag iban pa nga espesyal nga bisita halin sa kalibutan sang musika kag sports.
Mas ginpili sang duha nga personal nga ipadala ang ila mga imbitasyon sa mga bisita sa baylo nga magusar sang digital invitations.
Kabahin ini sang ila handum nga mapabilin ang privacy sang okasyon kag malikawan ang paglapta sang mga detalye sang kasal sa social media kag iban pa nga online platforms.
Madumduman nga makapila na ka beses nga nagperform si Taylor Swift sa Madison Square Garden sa nagligad nga mga tuig, kun sa diin nakapahamtang siya sang madinalag-on nga mga konsiyerto kag napuno ang venue sang iya mga supporters.
