Pormal na nga ginpaidalom na sa “state of calamity” ang bug-os nga probinsiya sang Maguindanao Del Sur bangud sa malapnagon nga pagbaha.
Ini makaligad nga ginpirmahan ni Governor Bai Mariam Sangki Mangudadatu ang ginpasar nga resolution sang Sangguniang Panlalawigan matapos mapagkit ang tuman ka lapad nga danyos sa pagpanalasa sang baha.
Sa pinakalatest nga datos sang Maguindanao Del Sur, naglab-ot na sa (17) ka munisipyo ang apektado sang baha kun diin yara sa masobra 71,000 ka pamilya ang apektado sang kalamidad.
Padayon man ang paglibot sang Provincial Government agud makapanghatag sang foodpacks,non-food items kag cash assistance sa mga apektado nga pamilya.
Magluwas sini, ginamonitor man sang Provincial Disaster Risk Reduction Management ukon PDDRMO ang sitwasyon sang mga pamilya nga apektado sa bulog nga probinsiya.
Kaangot sini, ginahingyo sang gobernadora sa tanan nga ahensiya kag pumuluyo nga magbuligay agud masalbar ang mga residente nga apektado sang kalamidad.
