Naglahad ng seryosong mga alegasyon ang saksi sa impeachment na si Ramil Madriaga kaugnay sa umano’y paulit-ulit na paghahatid ng malalaking halaga ng pera sa mga opisyal na may kaugnayan sa Office of the Ombudsman.
Sa kanyang sinumpaang supplemental affidavit, sinabi ni Madriaga na kabilang umano sa mga tumanggap ng pera sina Ombudsman Samuel Martires at Assistant Special Prosecutor na si Ryan Rey Quilala.
Ayon sa kanyang pahayag, isinagawa umano ang mga transaksiyon sa ilalim ng direktang utos nina Vice President Sara Duterte at dating Pangulo Rodrigo Duterte.
Inilarawan ni Madriaga ang isang sistemang tinawag niyang “drops,” kung saan inilalagay ang pera sa loob ng mga sasakyang nakaparada sa mga itinakdang lugar, at iniiwan ang mga susi upang maiwasan ang direktang pakikipag-ugnayan.
Isa sa mga detalyadong insidente na kanyang binanggit ay naganap noong Disyembre 20, 2022. Aniya, naghatid sila ng dalawang bag ng pera sa compound ng Ombudsman matapos itong kunin mula sa Department of Education Central Office sa Pasig at dalhin muna sa kanyang bahay sa Cainta, Rizal.
Bandang alas-8:00 ng umaga, nagtipon ang grupo sa kanyang tirahan bago tumungo sa parking area ng Ombudsman. Pagdating doon, sinunod umano nila ang direksiyon ng guwardiya at ipinarada ang sasakyan na may lamang pera.
Dagdag pa niya, iniwan nila ang susi ng sasakyan sa ibabaw ng gulong—isang paraang aniya’y karaniwan nilang ginagamit sa paghahatid ng malalaking halaga ng salapi. Matapos ang operasyon, agad umano silang umalis sa lugar.
Bukod dito, iginiit din ni Madriaga na may hiwalay pa siyang personal na paghahatid ng halagang P15 milyon kay Quilala sa loob mismo ng tanggapan ng Ombudsman.
Ayon sa kanya, ang mga nasabing transaksiyon ay bahagi umano ng mas malawak na operasyon ng paglilipat ng pera na kanyang isinagawa sa loob ng ilang taon.
Sa kasalukuyan, wala pang inilalabas na opisyal na pahayag ang mga pinangalanang opisyal kaugnay sa mga alegasyong ito.
