KORONADAL CITY – Naglab-ot na sa linibo ka mga indibidwal ang nagapanilin sa evacuation center sa Barangay Raja Muda, Tacurong City samtang daw nangin dagat naman ang pila ka mga barangay sa syudad bangud sa padayon nga pagbubu sang mabaskog nga ulan nga nangin kabangdanan sang pagbaha.
Ini ang ginkumperma ni ni Barangay Raja Muda Chairwoman Ma. Rhodora Pauya sa pakighinun-anon sang Bombo Radyo Koronadal.
Suno sa opisyal, nagapadayon tubtub sa subong ang ang rescue operations sang pila ka mga na stranded nga residente sang ila nga barangay umpisa pa kagina sang kaagahon.
Dugang pa sang opisyal, tuman nga naapektuhan ang 3 ka mga Purok sa ila nga barangay nga ginalakipan sang Purok 6 ,Purok 7 kag Purok 8 nga sa subong taga hawak ang lebel sang tubig.
Naglab-ot naman sa masobra 50 ka ektarya sang mga pananom nga palay nga anihon na tani ang nadalasa sang tubig baha.
May mga palaisdaan man nga nabuhang bangud sa mabaskog nga paghagunos sang tubig- baha. Sa subong , naga hulat nalang sang bulig ang mga bakwit humalin sa lokal nga panggamhanan sang syudad sang Tacurong.
Samtang, naglab-ot naman sa 12 ka mga barangay sa banwa sang Banga kag halos 10 sa banwa sang Norala ,South Cotabato ang ginabaha man kun sa diin pila ka ektarya sang pala yan man ang nagkaraguba , 4 ka tayatay ang nagkaguba mga gin-anod nga mga palaisadaan kag mga hinuptan nga mga kasapatan ang napatay makaligad gin anud sang baha.
Isa man ang napatay sa Norala,South Cotabato samtang isa naman ang nagapabilin nga missing.
