KORONADAL CITY – Magahatag sang tunga sa milyon nga reward money ang local government unit sang Cotabato City sa sinuman nga makatudlo sa 2 ka suspek sa pagpasigabong sa nasambit nga syudad sang bisperas sang Bag-ong Tuig nga nagresulta sa kamatayon sang 2 ka persona kag masobra 30 naman ang napilasan.
Ini makaliad nga ginpagwa na sang Special Investigation Task Group South Seas ang laragway sang 2 ka persons of interest nga responsable sa pagpasigabong sa atubang sang South Seas Mall.
Sa interbyu sang Bombo Radyo Koronadal kay Police Supt. Aldrin Gonzales, spokesperson sang PNP 12, ang nasambit nga task group ang gindihon sang PNP-12 agud magpatigayon sang maidid nga imbestigasyon angot sa nasambit nga pagpamomba.
An laragway sang 2 ka suspek ang kwa halin sa CCTV Footage sang mall kun sa diin klaro ang 2 nga nagdaho-anay sang isa ka butang kag gindasok ini sa kilid sang isa ka lotto outlet sa 2nd floor sang mall kag gilayon nga nagbakwit.
Ginabulubanta nga yara sa 20 to 30 years old kag 50 to 60 years old ang mga edad sang 2 ka suspek.
Sa karon, ginatutukan sang Special Investigation Task Group SouthSeas ang posible nga kaangtanan sang 2 ka suspek sa mga local terrorist kag armado nga grupo sa South Central Mindanao.
