KORONADAL CITY – Yara na sa kustodiya sang Isulan PNP ang isa ka suspek nga ginaakusaran nga nagabaligya sang peke nga gold bar sa bahin sang Brgy. Kalawag 2, Isulan, Sultan Kudarat..
Sa interbyu sang Bombo Radyo Koronadal, ginkilala ni Isulan PNP chief of police Lt. Col. Joven Bagaygay ang suspek nga si Jolito Basil Sandiman, 29 kag residente sang Brgy. Bagras, Palimbang, Sultan Kudarat.
Nadakpan ini sa ginpatigayon nga entrapment operation sa nasambit nga lugar partikularmente sa atubangan sang Iglesia ni Cristo nga simbahan kun sa diin naaktohan nga ginapangayoan sang suspek sang P4,000 ang biktima nga si Merlita Dusado, 50, kag taga-Brgy. Baluan, Palimbang sa nasambit man nga banwa.
Nakuha sa suspek ang madamo nga mga ID, ang peke nga gold bar kag isa ka small sachet sang ginapatihan nga shabu.
Gin-ako naman ni Sandiman nga nagikan sa siyudad sang Davao ang nasambit nga peke nga butang.
Modus suno pa sang grupo sang suspek nga padayon nga magpangayo sang kwarta sa ila biktima katal-os suno pa sang paghatag sang nasambit nga butang sa ila.
Sa subong napasakaan na ini sang kaso sang swindling kag pagbayolar sa RA 9165.
