Ginpabaskog sang Koronadal National Comprehensive High School (KNCHS) ang mga tikang sa seguridad kasunod sang mga pagpamahog nga naglapta sa social media.
Sa interview sang Bombo Radyo Koronadal kay Assistant Principal Sonny Pama, para sa Operations and Learner Support, padayon ang koordinasyon sang pamunuan sang buluthuan sa mga otoridad kag ang pagmonitor sa online information agud masiguro ang kaluwasan sang mga estudyante kag personnel.
Bilang kabahin sang mas istrikto nga seguridad, ginpabaskog ang pagcheckyar sang mga bag kag identification cards, samtang mas ginpabaskog man ang paglibot sang principal kag mga personnel sa sulod sang campus agud mapungngan ang pagsulod sang mga armas.
Dugang pa sa mga ini, ginatutukan sang buluthuan ang mga estudyante nga mahimo nagaatubang sang personal ukon problema sa pamilya para sa temprano nga pagkilala kag psychosocial intervention.
Samtang, ginapadayon man sang pamunuan ang koordinasyon sa pagkilala sang mga social media account ukon indibidwal nga mahimo may kaangtanan sa ginreport nga mga kabalaka.
Kabahin man sang preventive measures ang room-to-room orientation kag aktibo nga partisipasyon sang mga manunudlo sa pagpatuman sang security protocols.
Sa pihak nga bahin, nagapreparar man ang KNCHS sa pagpartisipar sa nationwide disaster drill bilang kabahin sang pagpaandam sang buluthuan sa nagkalain-lain nga emerhensiya.
