Gindumdom ni anay Koronadal City Mayor Fernando Miguel ang dako nga kontribusyon ni General Paulino Santos sa pagtukod kag pag-uswag sang Syudad sang Koronadal.
Sa interview sang Bombo Radyo Koronadal, ginpahayag ni Miguel nga nangin importante ang papel ni General Santos sa pag-organisar sang mga settlers nga naghalin sa Luzon kag Visayas.
Ginpahayag niya nga ginpangitaan ni General Santos sang duta nga pagatamnan kag istaran ang mga settlers, nga nangin pundasyon sang Marbel Settlement.
Ginkilala man ni Miguel ang disiplina kag maayo nga pagplastar ni General Santos sa settlement nga nakabulig sa pagtukod sang organisado nga komunidad.
Sa liwat man nga ginpahinumdom ni Miguel sa bag-o nga henerasyon ang importansya sang pagserbisyo ni General Santos para sa Koronadal kag ginapangabay nga padayon nga dal-on sang kabataan ang maayo nga disiplina, pagtrabaho kag pagtuman sang katungdanan, indi lang para sa kaugalingon nga buwas damlag, kundi para sa kabug-usan nga komunidad.
