Nagapati ang anay Senate President nga si Sen. Koko Pimentel nga mahimo na nga imbestigahan ang Office of the Vice President bangud sa ginaalegar nga maanomalya nga pagusar sang public funds.
Ini ang apisar nagapadayon na ang impeachment trial batok kay VP Sara bangud man sa kasubong nga issue.
Suno kay Sen. Koko, wala sang ‘immunity from suit’ si VP Sara sa idalom sang 1987 Constitution gani mahimo lang siya nga imbestigahan sang Office of the Ombudsman kadungan sang hearing nga ginahimo sang Senado.
Kaangot sini mahimo man suno pa sa anay Senate President nga mag-initiate sang imbestigasyon ang Ombudsman, bilang isa ka independent constitutional body.
Mahimo suno pa kay Pimentel nga ibase sang Ombudsman ang imbestigasyon sa mga dokumento nga una na nga nagguwa sa nagkalain-lain nga forum kasubong sang mga imbestigasyon nga ginhimo sang House of Representatives kag sang Senado bilang impeachment court.
Antes pa sini, ginawhag man ni House prosecutor Rep. Terry Ridon ang Ombudsman nga umpisahan na nga imbestigahan ang OVP bangud sa ginaalegar nga maanomalya nga paguusar sang confidential funds halin 2022 tubtob 2023.
Suno sa iya, naggaguwa sa testimoniya sang mga House witness nga pila ka beses na nga ginlapas sang talatapan ni VP Sara ang Commission on Audit Joint Circular 2015-01, nga ngapahayag nga ang special disbursing officer lang ang may responsibilidad nga mag-disburse sa confidential funds.
