Nagpatuman sang hugot nga mga tikang sa ikaayong lawas ang mga awtoridad sa Nigeria matapos makumpirma ang isa ka kaso sang Ebola virus disease sa kapital nga siyudad sang Abuja. Ang pasyente isa ka babaye nga may bag-o nga maragtas sang pagbiyahe pakadto sa Uganda.
Suno kay Nigerian Health Minister Muhammad Ali Pate, yara na sa isolation ang pasyente kag ginahatagan sang nagakaigo nga pag-atipan medikal. Ginapadayon man sang mga health authority ang ila imbestigasyon agud malikawan ang posible nga paglapta sang makatalagam nga balatian.
Sa impormasyon nga ginpagwa sang World Health Organization (WHO) sang Oktubre 20, nagsugod ang mga sintomas sang pasyente sang Oktubre 7, apat ka adlaw matapos ang iya pag-abot sa Nigeria. Sang Oktubre 11, nagpacheck-up siya sa isa ka pribado nga pasilidad panglawas sa Abuja. Apang, sang Oktubre 20 pa lamang nakumpirma paagi sa laboratory testing ang presensya sang Ebola virus.
Samtang ginapangita sang mga awtoridad ang posible nga mga tawo nga nalatnan sa impeksiyon, 44 na ka indibidwal ang natukiban sa contact tracing. Lakip sa mga ginamonitor ang mga health worker, pasyente, tag-atipan kag iban pa nga mahimo nakaupod sang babaye sa iya pagbiyahe ukon sa mga pasilidad nga iya ginkadtuan.
Padayon pa ang pag-usisa sang mga eksperto sa panglawas agud mahibaluan ang posible nga ginhalinan sang impeksiyon kag masubay ang kompleto nga travel kag exposure history sang pasyente. Ginapaninguhaan man nga matukoy kun may yara pa sang iban nga tawo nga kinahanglan obserbahan ukon ipaidalom sa dugang nga pagsusi.
Ang Ebola isa ka seryoso nga balatian nga mahimo magresulta sa kamatayon. Mahimo maglakip sang hilanat, sobra nga kaluya, sakit sang ulo kag lawas, pagsuka kag iban pa ang mga sintomas sang nasambit nga balatian. Sa pila ka kaso, mahimo man magtuhaw ang pagdugo.
Ang virus nagalapta paagi sa direkta nga pag-angot sa dugo ukon iban nga likido sang lawas sang tawo nga may impeksiyon, lakip na ang pag-angot sa mga butang nga kontaminado sang virus. Mahimo man ini mapasa paagi sa direkta nga pag-angot sa lawas sang tawo nga napatay bangod sa Ebola.
