Karambola sang isa ka patrol car, E-Jeep, isa ka pribado nga salakyan kag tatlo ka motorsiklo ang nagluntad sa bahin sang Crossing Glamang, Polomolok, South Cotabato, Pebrero 13, 2025 pasado 8:45 sang aga.
Ini ang ginkumpirma ni PltCol Peter Pinalgan, ang hepe sang Polomolok PNP sa interbyu sang Bombo Radyo Koronadal.
Suno sa ila imbestigasyon, samtang ginabaybay sang Sultan Kudarat police patrol car nga ginamaneho ni Cpl. Agno ang national highway halin sa Sultan Kudarat nabanggaan sini ang E-Jeep nga ginamaneho ni Crisanto Villagonzalo nga paliko kuntani sa Brgy. Glamang kag sang nagbangga na ini, naulamid ang Honda Civic nga ginamaneho naman ni Richard Soliva sa pihak nga linya.
Bangud sa kakusog sang impact, nag diretso ini sa kilid nga gintunaan nga mabunggo ini sa puno pati man ang mga naka park nga 3 ka motorsiklo.
Duha naman ang kumpirmado nga pilason nga pasahero sang E-Jeep kag driver sang Honda Civic kag padayon na sa karon nga nagapaayo sa balay bululngan.
Padayon naman nga nagapanawagan ang ila opisina nga mangin mahalong sa dalanon ilabi na sa national highway.
