Temporaryo nga nakaguwa na sa prisuhan si anay Senador Ramon “Bong” Revilla Jr. matapos siya nakapiyansa sang ₱1 milyon para sa kaso nga malversation nga iya ginaatubang.
Gin-aprubahan sang Sandiganbayan Third Division ang iya petisyon para sa temporaryo nga kahilwayan samtang nagapadayon ang trial.
Nagguwa siya sa Quezon City Jail Male Dormitory sa Payatas sang mga alas-6:15 sang gab-i, Hulyo 31, 2026.
Suno sa desisyon sang korte, ginpahanugutan nga makapiyansa ang anay senador bangud wala nakapakita ang prosekusyon sang igo kag mabakod nga ebidensya sang iya ginakabig nga sala sa sini nga bahin sang trial.
Madumduman nga ginakabig si Revilla sa mga kaso nga graft kag malversation may kaangtanan sa ginatawag nga anomalya sa ₱92.8 milyon nga “ghost flood control project” sa Pandi, Bulacan, nga makapila na niya ginpanginwala nga may yara siya sang ano man nga pagkalakip sa amo nga anomalya.
Ang petisyon lamang ni Revilla ang ginpaboran sang korte, samtang ginbalibaran sang Sandiganbayan ang aplikasyon sa piyansa sang iya mga kaupdanan nga akusado.
Madumduman nga nauna nga nga nakabayad si Revilla sang ₱90,000 nga piyansa para sa separado niya nga kaso nga graft sa idalom sang Fourth Division.
