Ginpaklaro sang kampo ni Vice President Sara Duterte nga legal kag wala sang conflict of interest ang ginpatigayon nga miting sang mga opisyal sang Office of the Vice President (OVP) kag Commission on Audit (COA), kag ginpahayag nga ang katuyuan lamang sini amo ang pagpaklaro sang mga audit guidelines.
Sa press briefing, nagpahayag si defense spokesperson Atty. Michael Wesley Poa nga wala sang nalapas nga layi kag ginpunto nga nagdesisyon na si Senate Impeachment Court Presiding Officer Sen. Francis “Chiz” Escudero nga wala sang conflict of interest sa amo nga isyu.
Ginpahayag ini ni Poa matapos kuwestyunon ni Senator-judge Raffy Tulfo ang iya pag-upod sa defense panel bangud sa ginpatuhoy nga pagtililipon nila sang COA.
Suno kay Atty. Poa, nangayo siya sang kahigayunan nga makapaathag agud indi magsala ang paghangop sang publiko sa katuyuan sang miting, nga suno sa testimonya ni COA auditor Roderick Wamil, ginpatigayon lang agud mapaklaro ang mga audit guidelines.
Dugang pa niya, nagpamatuod man si Wamil nga wala sang iligal nga natabo sa miting kag normal nga nagakonsulta man ang iban nga mga ahensya sang gobyerno sa COA may kaangtanan sa audit.
Gindugang ni Atty. Poa nga ang miting ginpangayo sang COA Internal Control and Fraud Audit Office (ICFAO), kag nagtambong siya bilang officer-in-charge for finance sang DepEd sa sina nga tion.
Ginpahayag man niya nga indi na siya magahatag sang dugang nga detalye agud indi malapas ang sub judice rule sang Senate Impeachment Court, kag nagpahayag nga ang amo nga isyu natalakay na sa korte kag didto man ini dapat padayon nga sabton.
