Ang pagbayluhanay sang “I Do” amo ang isa sa pinakamatam-is nga tion para sa magkahagugma.
Ginatandaan gid ang adlaw sang kasal bangud ginaselebrar ini sa kada tuig bilang tanda sang promisa sa isa kag isa nga maga-updanay sila tubtub sa katubtuban.
Apang sa New York, isa ka pinasahi nga drama ang nasaksihan antes pa man mabatian ini nga mga tinaga.
Sang amo nga adlaw, gindala sa sulod sang korte si Anthony Santiago, 33, tumandok sang Cleveland, Ohio nga isa ka suspek sa pagpangawat nga natabo sang nagligad pa nga 2022.
Ginpahayag nga sang amo nga tuig, nagbyahe ini sa North Syracuse agud nga magbaligya lang kuntani sang salakyan. Apang sang didto na siya, hinali lang nga nagkalam ang iya kamot sang may nakit-an siya nga mga marijuana sa sulod sang balay.
Bangud indi siya mahim-os kag indi gid makatulog sa pagpanumdom sang marijuana, ginkuntyaba sini ang iya duha ka abyan sa Cleveland agud nga balikan ang balay agud nga kawatan.
Isa ka bulan ang nakaligad, bangud nahitso na ang ila plano, nagpangita sila sang maayo nga timing agud matigayon ang pagpangawat. Gin-alegar nga ila pa gin-pistolwhip ang babaye kag lalaki nga yara sa sulod sang balay, kag ginpahayag man nga wala man nila ginsakit ang apat ka kabataan nga nagatinir sa sulod apang ila man ini ginpahog samtang ginatakab nila ang pila ka kagamitan.
Pagkatapos sadto, natukiban man nga indi man ini gali first time nga naka-komiter siya sang krimen. Isa gali ini ka serial offender kag tatlo ka beses na nga na-convict antes pa man ini naaresto sang 2022.
Sang sini lang nga 2023, gindagdag ni New York Judge Melina McGuinnigle ang sentensya kay Anthony nga amo ang 10 ka tuig nga pagkapreso bangud sa iya krimen nga nahimo.
Apang indi amo ina ang ending para sa iya bangud nga sang amo man nga adlaw natalana ang iya kasal. Apisar may posas na ang iya kamot, wala nag-atras ang bride nga si Victoria kag nagpakasal ini gihapon kay Anthony.
Wala na sang madamo nga tyempo nga nauyang bangud pila ka oras pa lang ini nga nakaguwa sa courtroom, nagbalik ini sa amo gihapon nga hulot, nag-atubang sa amo gihapon nga judge… kag sila ang ginkasal.
Madamo naman ang na-amaze sa sini nga “courtroom drama” bangud isa ka dekada man si Anthony nga manimuron sa presuhan, apang pagka-guwa sini, ginalauman nga yara gihapon ang babaye nga amo naman ang iya makaupod sa iya bilog nga kabuhi.
