Ginaduso sang South Cotabato provincial government ang patuman sang salary adjustment para sa mga job order personnel bilang sabat sa nagataas nga presyo sang mga nagapanguna nga balaklon kag agud mapaayo ang kahimtangan sang mga mamumugon sa probinsya.
Suno kay Vice Governor Arthur Pingoy Jr., gina-istoryahan subong sa Sangguniang Panlalawigan ang proposal nga nagatuyo nga mahatagan sang dugang nga sweldo ang mga JO workers sang gobyerno probinsyal.
Ginpahayag ni Pingoy nga natalupangdan sang gobyerno probinsiyal nga manubo ang sweldo nga ginabaton sang pila ka mga job order personnel, gani mas maayo nga magplastar sang salary adjustment agud makabulig sa ila adlaw-adlaw nga galastuhan. Gin-athag man sini nga indi mangin uniporme ang saka bangud igabase ini sa sahi sang trabaho kag katungdanan sang tagsa ka empleyado.
Ginhatagan pagtamod sang opisyal nga una nga nag-agi sa benchmarking kag maid-id nga pag-analisar ang nasambit nga proposal antes ini gin-endorso sang Sangguniang Panlalawigan agud masiguro nga nagasanto ini sa budgetary policies kag sa ikasarang sang probinsya sa pagpondo sang implementasyon sini.
Tinutuyo man sang provincial government nga mapadasig ang pagproseso sang nasambit nga proposal agud malikawan ang delay sa implementasyon sang salary increase sa tion nga maaprubahan na ini.
Sa subong, ginahulat na lamang sang aksyon ang Sangguniang Panlalawigan, lakip na ang pagpasiguro nga may bastante nga pondo para diri sa idalum sang ginaduso nga supplemental budget nga nagabalor sang ginabanta P294 milyones. Kalakip man sa nasambit nga pondo ang budget para sa mga infrastructure projects kag iban pa nga programa sang probinsya.
Samtang, una na nga gin-anunsyar sang provincial government sang South Cotabato ang pagbalik sa regular nga 5 ka adlaw nga work schedule sa kapitolyo matapos temporaryo nga ginpatuman ang 4 ka adlaw nga workweek bangud sa pagsaka sang presyo sang petrolyo sa pungsod.
