KORONADAL CITY – Patay ang isa ka preso samtang tatlo naman ang pilason sa nagluntad nga rambol sang mga preso sa sulod sang South Cotabato Provincial Jail.
Sa interbyu sang Bombo Radyo Koronadal kay Provincial Jail Warden Felicito Gumapac, nagluntad ang insidente alas 10:30 kaina sang aga sa katungaan sang pagtinlo sang mga preso bilang kabahin sang paglikaw sa coronavirus disease.
Suno kay Gumapac, antes ang nasambit nga rambol, nagbaisay anay ang mga inmates nga sanday Jeffrey Tilo kag Regin Montebor sang Selda 11 bangud lamang sa cleaning procedure.
Makaligad sini, nagbaisay naman sanday Primo Tanauay kag Norbel Ali kun sa diin nag-intra na ang iban nga mga preso tubtob sa nagresulta na sa rambol.
Sa katungaan sang kinagamo, pilason sanday Emboy Anan, Bai Salimbay, Jezrel Laboga kag Randy Austria nga gilayon nga gindangat sa ospital.
Nakaangkon lamang sang pilas sanday Tanauay, Laboga kag Salimbay, apang gindeklarar nga dead on arrival si Austria.
Nag-warning shot naman ang mga jail officers agud patahawon ang kinagamo kag ginsulod ang mga inmates sa ila tagsa ka mga preso.
Narekober naman sa ginluntaran sang kinagamo ang pila ka improvised bladed weapons.
Ginaimbestigaran na sang Koronadal City PNP ang nasambit nga insidente.
