Nagpanawagan ang manunudlo nga gamiton ang Ninoy Aquino Day bilang kahigayunan para mahangpan sang mga Pilipino, ilabi na sang kabataan, ang importansya sang demokrasya kag responsable nga pagpili sang mga lider sang pungsod.
Sa interview sang Bombo Radyo Koronadal kay si Adrian Pete Pregonir, iya ginpahayag nga indi lang dapat dumdumon si anay Senador Benigno “Ninoy” Aquino Jr. bilang isa ka personalidad sa maragtas, kundi ang mga prinsipyo nga iya ginpakigbatuan para sa demokrasya kag kinamatarong sang mga Pilipino.
Ginpahayag niya nga may dako nga papel ang edukasyon sa pagbulig sa kabataan nga mahangpan ang bili sang demokrasya kag ang ila responsibilidad bilang mga botante.
Suno pa sa iya, importante nga mahibaluan sang mga pamatan-on nga ang demokrasya indi lamang yara sa kahilwayan sa pagpahayag sang opinyon, kundi lakip sa paggamit sang kinamatarong sa pagboto.
Gani, gin-awhag niya ang mga Pilipino nga mangin maalam kag responsable sa pagpili sang mga lider nga may integridad, kapasidad kag matuod nga pagserbisyo sa pungsod.
Dugang pa niya, kinahanglan pilion ang mga lider nga may maathag nga prinsipyo kag handa magdumala para sa kaayuhan sang kadam-an, sa baylo nga magbase lang sa personal nga interes.
