Ginpasiguro ni Presiding Officer Chiz Escudero nga ang impeachment trial batok kay Vice President Sara Duterte pagapatigayonon nga nagabase sa kamatuoran kag sa prinsipyo sang hustisya, kag indi bilang himakas para sa bisan ano nga pampulitika nga interes.
Sa pagbukas sang impeachment proceedings subong nga Lunes, Hulyo 6, ginpabutyag ni Escudero nga ang katungdanan sang impeachment court amo ang pagpamati sang ebidensya, paghibalo sang kamatuoran, kag paghatag sang patas nga paghukom nga wala sang kinikilingan.
Bisan pa may nagapadayon nga mga isyu nga ginatalakay sang Senado, ginpahayag niya nga magapadayon ang mga senador sa pagtuman sang ila mandato bilang senador-judges nga may integridad, wala sang pinilian kag wala sang ginapaboran.
Ginhatagan man niya sang importansya ang pagpreserbar sang respeto kag propesyonalismo sa sulod sang impeachment court.
Suno sa iya, ang mga mainit nga argumento kag debate nga mahimo nga matabo sa nagasunod nga mga hearing indi dapat maguba sang maayo nga relasyon kag paghiliusa sa tunga sang mga senador.
Madumduman nga ginpili si Escudero bilang Presiding Officer sang impeachment court sa nagapadayon nga impeachment trial batok kay Vice President Sara Duterte sa baylo ni Senate President Sherwin Gatchalian matapos siya magdaog sa botohan sa 12 ka pabor kag 8 nga indi pabor.
