Gin-aprubahan sang House Committee on Justice ang mosyon ni Mamamayang Liberal Representative Leila de Lima nga mag-isyu sang subpoena ad testificandum kag subpoena duces tecum batok kay anay Senador Antonio Trillanes IV agud patambungon siya sa masunod nga impeachment hearing sa Abril 22 nga nagausisa sa mga reklamo batok kay Vice President Sara Duterte.
Base sa desisyon sang komite, ginakinahanglan nga magpresentar si Trillanes sang iya testimonya kag mga kaupod nga dokumento nga mahimo magbulig sa imbestigasyon, ilabi na may kaangtanan sa ginapatihan nga unexplained wealth kag posible nga wala pagdeklara sang iban nga assets sang Bise Presidente.
Ang amo nga tikang kabahin sang padayon nga pagdihon sang House panel sa mga impeachment complaints nga ginpsang-at batok kay Duterte, nga nagalakip sang mga alegasyon sang paglapas sa pagsalig sang publiko, pag-usar sang confidential funds, kag iban pa nga isyu nga ginatan-aw subong nga may husto nga basehan para usisa-on.
Suno sa mga opisyal, ang pagtawag kay Trillanes bilang testigo ginlantaw nga importante agud mapalawig ang ebidensya kag testimonya nga pagabasehan sang komite antes maghimo sang dugang nga tikang sa impeachment proceedings.
