KORONADAL CITY- Gindayaw sang mga netizens ang isa ka holdaper makaligad nangibabaw ang iya kunsensya sa baylo nga magpanakit sang isig katawo kag mangawat sang indi iya.
Nahibaluan nga kadungan sang Semana Santa kun sa diin masako ang tanan sa obserbasyon, nagapamintaha naman ang pila sa mga kawatan sa nagkalain-lain nga lugar apang lain suno pa ang ginpakita sang kawatan sang gintilawan nga magpangbiktima sa banwa sang Surallah, South Cotabato bangud may kasubong nga “Pusong Mamon” suno pa ini makaligad nangin kasubong sa drama ang nasambit nga insidente.
Suno sa impormasyon, ginhana nga magpangholdap sang wala pa natumod nga lalaki sa isa ka Pharmacy sa Brgy. Dajay Surallah South Cotabato kun sa diin isa lang ang tindera sa nasambit nga establisemento.
Nakabonnet suno pa ang suspek kag pahutik nga ginpahayag sa tindera sang pharmacy nga indi ini magsinggitan kag ihatag na lang sang malinong ang kwarta apang ginpahayag sang tindera na gindeposit na sini ang kwarta kag lunsay sinsilyo nalang an nabilin.
Bangud sa kahadlok nagapalangurog nga naghibi ang tindera kag nagpangamuyo nalang nga indi ini pagsakiton sang suspek kag suno sa iya nakit-an niya kun paano nakunsensya ang holdaper kag nakahibi man suno pa ini kag posible nakabatyag man sang kaluoy.
Ginhambala pa sini ang tindera nga indi na maghibo kag madasig nga nagdalagan padulong sa iya motorsiklo kag nagpalagyo sa wala mahibaluan nga direksyon.
Sa karun nagapadayon pa ang imbestigasyon sang Surallah PNP sa nagluntad nga insidente.
