KORONADAL CITY – Target suno pa sang Bangsamoro Islamic Freedom Fighters kag Dawlah Islamiya terror group ang hepe sang Datu Piang PNP sa ginpatigayon nga pag-atake sang nasambit nga armado nga grupo sa Datu Piang, Maguindanao kagab-i.
Ini ang ginkumpirmar ni 6th Infantry Division Philippine Army spokesperson Lt. Col. Anhouvic Atilano sa interbyu sang Bombo Radyo Koronadal.
Suno kay Atilano, gin-atake sang yara sa 50 ka miyembro sang terror group ang Datu Piang PNP bangud target sang ila pag-atake si PCapt. Israel Bayona, makaligad suno pa nga nakaengkwentro sini sadto ang pila ka pamilya nga may kaangtanan sa BIFF kag Dawlah Islamiya.
Una na nga ginpanginwala sang opisyal nga ginsunog suno pa ang pila ka mga edipisyo sa tion sang pag-atake sang mga terror group, magluwas lamang sa police patrol car.
Sa subong gindeklarar na nga cleared ang banwa sang Datu Piang makaligad ang pag-atake.
Naka-heightened alert naman ang mga kapulisan kag kasuldadohan sa mga kaiping nga banwa kasunod sang insidente.
