KORONADAL CITY- Naglab ot na sa halos 300 ka mga pamilya ang apektado sang mga pagbaha bangud sa wala untat nga buhos sang ulan sa apat nga banwa sang South Cotabato.
Ang nasambit nga mga banwa ang ginakalakipan sang Banga, Noral, Sto. Nino kag Lake Sebu.
Sa banwa sang Banga yara sa 136 ka mga apektado nga pamilya kung sa diin ginsulod sang tubig-baha ang mga panimalay halin sa 9 ka barangay.
Ini naman ang nangin kumpirmasyon ni Mayor Clemente Fedoc sa interbyu sang Bombo Radyo Koronadal.
Suno sa iya, yara sa 100 ka pamilya ang apektado kung sa diin kasamtangan anay nga nagbakwit ini sa baranagay gymnasium sa Barangay San Miguel sa banwa sang Norala makaligad ini nga ginbaha.
Luwas pa sa mga panimalay nga ginbaha, naguba man ang mga pala isdaan sa banwa sang Banga, mga tanom kag palayan sang mga mangunguma.
Apektado man sang tuman ka mabaskog nga ulan ang iban pa nga mga banwa nga kung sa diin nadumduman nga kahapon nagdeklara ang mga ini sang class suspension.
Gilayon naman nga naghatag sang bulig ang prvincial engineering office sang South Cotabato agud makakas ang mga rurok sa mga sapa sa nasambit nga mga lugar nga kung sa diin amo ini ang kabangdanan nga may baha.
Sa karon, padayon ang ginahimo nga monitoring sang PDRRMO South Cotabato sa bug os nga probinsya labi na sa mga landslide prone areas.
