KORONADAL CITY- Nagapadayon sa karun ang imbestgasyon sang mga otoridad sa pagpangluthang patay sa isa ka freelancer technician, samtang pilason ang iya nga asawa kag bata sini nga isa ka menor de edad sa national highway, Barangay Taviran, Datu Odin Sinsuat, Maguindanao del Norte.
Ginkilala ni Police Major Regie Abellera- Chief of Police sang Datu Odin Sinsuat, Maguindanao ang napatay nga si Haron Maulana samtang ang mga pilason naman amo ang asawa sini nga si Joy ” Lenlen ” Maulana kag ang ila nga bata nga 17 anyos nga si alyas Jay nga lunsay mga residente sang Barangay Awang, Cotabato City.
Suno pa sa opisyal, sakay ang Tamaraw FX padulong sa Cotabato City ang magkapamilya sang gintambangan sang mga aramado nga grupo sakay sang four-wheeled vehicle nga nakasunod pa suno pa sa ila.
Armado suno pa sang matag-as nga kalibre sang pusil ang mga suspek nga responsable sa pangpamusil sa pamilya Maulana//Halos tadtad sang bala ang windshield sang salakyan sang magpamilya bangud sa asud-asod nga pagpaulan sang bala nga ginhiwat sang mga suspek.
Dead on the spot ang driver sang salakyan nga sya man ang padre de pamilya samtang nadala pa sa balay-bulungan ang mag-iloy sini.
Sa karun, nagahiwat na sang follow up investigation ang PNP para matukoy ang suspek kag mangin man ang motibo sa pagpangluthang.
Ginapanan-aw man ang personal grudge nga posible nga bangdanan sang krimen.
Mas ginapasangkad man sa karun sang mga otoridad sa nasambit nga lugar agud nga malikawan nga maliwat ang mga panghilitabo nga nagaruluntad.
