Ginpahayag sang Iran nga wala pa ini nakahimo sang katapusan nga desisyon sa posible nga kasugtanan nga nagatinguha nga tapnaon ang tensyon sa Middle East, bisan pa sang pahayag ni US President Donald Trump nga mahimo ini mapirmahan sa sulod sang pila ka adlaw.
Suno kay Iran Ministry of Foreign Affairs spokesperson Esmaeil Baqaei, may mga bahin sang kasugtanan nga naugyunan na, apang napunggan ang pag-uswag sini bangud sang bag-o nga mga kondisyon nga ginhan-ay sang United States.
Ginpaandaman man sang Iranian state media ang publiko nga indi anay magpati sa mga pahayag ni Trump samtang wala pa ini ginakumpirmar sang Tehran.
Samtang, nagsiling si Trump nga naaprubahan na suno pa ang mga detalye sang kasugtanan sang liderato sang Iran kag sang mga kaalyado sini sa rehiyon, lakip ang Israel.
Suno naman sa Israel, nag-estoryahan na sila ni Israeli Prime Minister Benjamin Netanyahu kag Trump may kaangtanan sa posible nga pagkuha sang nuclear materials sang Iran kag pagdula sang missile capabilities sini.
Padayon gihapon ang tensyon sa rehiyon bisan pa sang temporaryo nga ceasefire sang Abril.
Ginpahanumdom man sang Iran ang posible nga epekto sini sa pangkalibutan nga ekonomiya, labi na sa seguridad sang Strait of Hormuz.
