Nagpabutyag sang indi pagpabor ang isa ka estudyante sa ginapropose nga pagsaka sang pamasahe sa syudad sang Koronadal.
Sa interview sang Bombo Radyo Koronadal kay John Paul Gaton, isa ka commuter kag estudyante, iya ginpahayag nga apisar wala pa ginapatuman ang fare increase, may mga traysikol driver na nga naga panukot sang sobra ukon labaw sa nakatalana nga pamasahe.
Suno kay Gaton, kun mapatuman ang fare increase, posible nga mangin mas mabug-at ini sa iya kag sa iban pa nga mga estudyante nga nagadepende sa traysikol sa ila adlaw-adlaw nga pagbiyahe.
Suno sa iya, ang P25 tubtob P30 nga ginagasto niya kada adlaw para sa pamasahe isa na ka dako nga kabug-atan sa iya bilang estudyante.
Bangud sini, nagapanawagan si Gaton sa mga traysikol driver nga nagapanukot sang sobra ukon labaw sa fare matrix nga untaton na ini nga buluhaton.
Suno sa iya, indi ini patas sa mga pasahero nga nagapaninguha man sa adlaw-adlaw nga pangabuhi kag nagatinguha nga maigo ang ila limitado nga kwarta para sa ila mga kinahanglanon.
