KORONADAL CITY- Naghimo sang Task Force ang Bangsamoro Government nga maghiwat sang madalom nga imbestigasyon sa serye sang pagpangluthang sa bahin sa Pikit, North Cotabato.
Ang nasambit nga direktiba ang halin kay BARMM Chief Minister Ahod Ebrahim agud mahatagan na man sang gilayon nga aksyon ang nagalala nga sitwasyon sa magkalaban nga angkan sa nasambit nga lugar.
Kadungan sini, ginaduso man ni Ebrahim nga ang serye sang pagpangluthang-patay sa nasambit nga banwa ang indi sang Muslim-Christian conflict.
Bangud ini ang may yara sang mga nagalapta nga impormasyon nga kung ang biktima sang pagpangluthang ang Christian gilayon nga ginatudlo sini amo ang mga Muslim nga amo suno pa ang naghimo kag kung sa Muslim naman ang biktima ginatudlo man sa mga Kristyano ang kahimuan.
Luyag suno pa sang opisyal nga maathagan ang tanan kag indi na maliwat pa ang mga panghilitabo sadtong nakaligad nga tinuig.
Una sini, dalawa ka binatilyo nga pauli halin sa Pikit National High School ang ginpangluthang sa Barangay Gli-Gli sa nasambit nga banwa sadtong Pebrero 14 nga nagresulta sa pagkapatay sang isa ka 13 anyos nga bata kag pagkapilas naman sang dalawa ka menor de edad nga kaupod sini.
Ginsundan man ini sang pagpamusil kahapon sang hapon nga nagresulta sa pagkapilas sang isa ka 15 anyos kah 42 anyos.
Ginahibalo pa sa karun sang mga otoridad ang idendity sang mga suspek nga naggamit suno pa sang malagba nga kalibre sang pusil.
Ginapasangkad naman ang seguridad sang Cotabato Police Provincial Office ang panghilitabo kag nagapanawagan sang kooperasyon sa mga testigo nga posible nga nakakita sang insidente.
Bangud sa asud-asud nga pagluthanganay, nagdeklara si Pikit Mayor Sumulong Sultan sang suspension of classes tubtob subong nga adlaw sang Biyernes.
