Sa gitna ng tumataas na gastos sa agrikultura dahil sa tensyon sa Middle East, tiniyak ni Agriculture Secretary Francisco Tiu Laurel Jr. na nananatiling matatag ang suplay ng bigas sa Pilipinas.
Bagama’t may pagtatayang maaaring bumaba ng hanggang 20% ang produksyon ng palay, nilinaw niyang isa lamang itong “worst-case scenario” at hindi inaasahang mangyari dahil sa mga hakbang na ipinatutupad ng pamahalaan. Sa kasalukuyan, sapat ang suplay ng bigas sa pandaigdigang merkado—lalo na mula sa mga bansang tulad ng India at Vietnam na nasa kasagsagan ng anihan—na nagbibigay ng dagdag seguridad sa suplay ng bansa.
Ayon din sa kalihim, halos puno ang imbakan ng National Food Authority (NFA), na nagsisilbing reserbang bigas para sa mga posibleng kakulangan.
Upang higit pang mapalakas ang sektor ng agrikultura, naglaan ang Department of Agriculture ng P10 bilyong ayuda para sa mga magsasaka at mangingisda. Kabilang dito ang fuel subsidies at iba pang targeted interventions, na nakatuon sa pagpapatatag ng produksyon ng bigas. Nakahanda rin ang pamahalaan na magdagdag ng hanggang P20 bilyon para sa farm inputs at P10 bilyon pang suporta sa fisherfolk kung kinakailangan.
Kasabay nito, isinusulong ng DA ang paggamit ng mga alternatibong solusyon gaya ng biofertilizers upang mabawasan ang pagdepende sa mamahaling agricultural inputs at mapanatili ang matatag at abot-kayang produksyon ng pagkain sa bansa.
