Ginpatibusok sang militar ng Estados Unidos ang apat nga “one-way attack drones” sang Iran nga ginlunsyar padul-ong sa Strait of Hormuz, matapos ginaalegar nagtuga ang mga ini sang pamahog sa trapiko nga pandagat sa rehiyon.
Suno sa United States Central Command (Centcom), nagpatigayon ang pwersa sang Estados Unidos sang pag-atake sa mga coastal surveillance radar site sang Iran sa Goruk kag sa Qeshm Island agud punggan ang posible nga mga madason nga pag-atake.
Nagablos man ang Iran pinaagi sa paglunsyar sang 7 ka ballistic missile batok sa mga base militar kag pasilidad sang US sa Kuwait kag Bahrain.
Ginpahayag sang Centcom nga 6 ka mga missile ang naintercept, samtang ang isa ang wala nagtupa sa target sini.
Nagluntad ang pinakaulihi nga bayluhanay sang mga pag-atake samtang nagapabilin nga wala nagapadayon ang ceasefire agreement sa tunga sang US kag Iran.
Madumduman nga isa ka ang napatay kag masobra 60 ang napilasan matapos maigo sa drone attack ang internasyonal nga pahugpaan sang Kuwait.
Samtang ginpanginwala sang Islamic Revolutionary Guard Corps (IRGC) ang insidente, apang gindepensahan sang Centcom nga sinadya kag planado ang pag-atake.
Naglala ang tensyon sa Middle East halin sang magpatigayon sang lapnagon nga pag-atake ang US kag Israel batok sa Iran sang Pebrero.
Bilang sabat, ginsalakay sang Iran ang Israel kag pila ka kaalyado sang US sa Gulf kag epektibo nga ginasarado ang Strait of Hormuz.
