Nagpaguwa ang Department of Trade and Industry (DTI) sang opisyal nga price guide sang mga school supplies para sa School Year 2026-2027 agud buligan ang mga ginikanan kag estudyante sa pagpili sang kinahanglanon para sa masunod nga pagbukas sang klase.
Sa ginpaguwa nga School Supplies Price Range Guide, ginplastar sang DTI ang minimum kag maximum nga presyo sang nagkalain-lain nga gamit sa eskwelahan pareho sang notebooks, papel, lapis, ballpen, krayola, eraser, sharpener kag ruler.
Base sa listahan, ang presyo sang writing notebook kag composition notebook nga may 80 pages, nagadalagan halin P13 tubtob P52 kada isa. Samtang ang spiral notebook naman ginpresyuhan halin P14 tubtob P49, kag ang yarn notebook halin P14 tubtob P47.
Ang grade pad paper may presyo nga P13 tubtob P37 kada pad, samtang ang intermediate pad naga-range halin P22 tubtob P69.75.
Para naman sa iban nga gamit sa pagtuon, ang lapis ginpresyuhan halin P12 tubtob P18 kada bilog kag P15 tubtob P24 per pack. Ang ballpen may presyo nga P3 tubtob P21 kada bilog kag P18 tubtob P27 per pack.
Samtang, ang kahon sang krayola nga may 8 tubtob 24 ka kolor naga-range halin P12 tubtob P114. Ang eraser may presyo nga P8 tubtob P20 kada bilog, ang sharpener halin P16 tubtob P69, kag ang ruler halin P8 tubtob P32.
Panugyan sang DTI sa publiko nga gamiton ang price guide bilang reperensya sa pagpili agud masiguro nga makabakal sang dekalidad kag patas nga presyo nga mga school supplies para sa nagahilapit nga pagbukas sang klase.
Naghatag man ang DTI sang QR code kag online link para sa kumpleto nga listahan sang presyo sang mga school supplies nga mahimo ma-access sang publiko.
