Ginpaklaro sang Department of Health (DOH) nga wala sang kaso sang Ebola sa Pilipinas.
Suno kay DOH spokesperson Albert Domingo, klaro nga wala pa sang kaso sa pungsod gani wala sang rason nga magpanik ang mga Pilipino tunga sang napa-report nga outbreak sang masakit sa Democratic Republic of Congo.
Kasamtangan nga manubo pa ang porsyento nga magka-kaso sang Ebola sa pungsod bangud malayo ini West Africa kun sa diin napagkit ang Ebola outbreak.
Ginpahayag man sang opisyal sang DOH nga wala sang ginrekomendar nga travel ban ang World Health Organization (WHO), gani indi man ini ipatuman sang pungsod.
Apang, magapatuman ang Bureau of Quarantine sang mas hugot nga screening sa mga biyahero nga halin sa Democratic Republic of Congo kag Uganda.
Madumduman nga una na nga gin-deklarar sang WHO ang Ebola outbreak sa nasambit nga mga pungsod bilang public health emergency of international concern.
Sa pihak nga bahin, ginreport ni USec. Domingo nga ginatuonan na sang mga eksperto sang WHO ang posible nga bulong kontra sa Bundibugyo virus nga kabangdanan sang Ebola outbreak pareho sang Remdesivir, nga gin-gamit sadto bilang bulong kontra COVID-19.
Nagpaalinton naman ang opisyal sang DOH ang publiko nga palig-unon ang ila resistensya ukon immunity agud malikawan ang pagkalaton sang amo nga masakit, nga naga-transfer paagi sa body fluids.
