Padayon sa pagpangita sang kamatuoran kag hustisya ang pamilya ni late photojournalist Reynaldo Mumay, 17 ka tuig matapos ang 2009 Maguindanao Massacre, apesar tubtob subong wala pa makita ang iya patay nga lawas.
Sa interview sang Bombo Radyo Koronadal, ginpahayag sang iya bata nga si Ma. Reynafe Mumay-Castillo nga masakit para sa ila pamilya nga wala gihapon sang kasiguruhan sa kapalaran sang iya amay, apesar narekober sa massacre site ang iya dentures, jacket kag photography equipment.
Mas nagdugang pa sa ila kasakit ang 2019 court ruling nga nagresulta sa acquittal sa kaso nga may kaangtanan sa iya amay bangud sa kakulang sang ebidensya kag reasonable doubt.
Bangud sini, nag-file ang pamilya sang appeal sa Court of Appeals sang amo man nga tuig. Suno kay Mumay-Castillo, ginpasaylo na niya ang mga responsable sang 2011, apang padayon gihapon ang iya pagpangayo sang hustisya.
Ginpahayag man niya nga may mga pamilya na sang mga biktima nga nagmasakit kag napatay nga wala pa makita ang resulta sang ila pagpangita sang kamatuoran.
Padayon man niya nga ginapaambit ang ila eksperyensya paagi sa documentary film nga “58,” nga nagasaysay sang trauma sang mga pamilya sang biktima gamit ang rotoscoping animation.
Nagpanawagan man siya sa publiko, ilabi na sa mga pamatan-on, nga mangin kritikal sa impormasyon kag responsable sa pagpili sang mga lider paagi sa pagboto.







