-- ADVERTISEMENT --

Ginkwestyon ni University of the Philippines (UP) College of Law Associate Dean Atty. Paolo Emmanuel Tamase ang mga testimonya sang pila ka testigo nga ginpresentar sang defense team ni Bise Presidente Sara Duterte, bangud imbes nga makapabakod sa depensa, nagahatag pa ini kuno sang dugang nga kabug-aton sa kaso sang opisyal.

Suno kay Tamase, isa sa mga halimbawa amo ang mga pahayag sang mga testigo tuhoy sa GenCorp Industries, isa sa mga kompaniya nga nalakip sa business interests ni Duterte suno sa iya Statement of Assets, Liabilities, and Net Worth (SALN).

Ginpaathag ni Tamase nga gintuyo sang depensa nga ipakita nga wala nakalista si Duterte sa corporate records sang kompaniya bilang stockholder, director ukon officer. Apang, ang mga testigo mismo sang depensa ang nagapahayag nga regular ini nga nagabaton sang kuwarta halin sa nasambit nga kompaniya, nga suno sa abogado mahimo maghatag sang kabaliskaran sa argumento sang depensa.

Samtang, suno sa iskedyul sang Senate Impeachment Court, magapadayon sa Disyembre 1 ang impeachment trial batok sa Bise Presidente, kun sa diin igapresentar pa sang iya defense team ang nabilin nga mga testigo kag ebidensya.

Tubtob karon, siyam na ka testigo ang napresentar sang depensa, nga ginabug-usan sang anum ka testigo sang Nobyembre 9 tubtob 12 kag tatlo naman sang Nobyembre 19 tubtob 20, bisan madamo sa una nga ginplano nga mga testigo ang wala na pagpadayonon.