-- ADVERTISEMENT --

Nagapanawagan sang konkreto nga aksyon ang mga hog raisers sa Tupi, South Cotabato kay Mayor Romeo Tamayo agud masolusyunan ang padayon nga pagnubo sang presyo sang buhi nga baboy kag kalugian sa ila pangabuhian.

Sa interview sang Bombo Radyo Koronadal ginpahayag ni Arthur Jaurigue, leader sang Tupi Hog Raisers Association (THRA), ginahingyo nila nga magpagwa ang alkalde sang Executive Order (EO) nga magabutang sang P166 kada kilo nga floor price para sa lokal nga hog raisers kag P200 tubtob P210 kada kilo para sa mga lisensyado nga buyers.

Kabahin sang ila panawagan ang forum kag dialogue subong nga adlaw sang miryerkules Nobyembre 18, alas-9 sang aga sa Municipal Hall sang Tupi, nga pagatambungan sang alkalde, hog raisers kag meat vendors agud talakayon ang ila mga reklamo kag posible nga solusyon.

Ginpahayag man ni Jaurigue nga isa sa mga ginatudlo nga rason sang pagnubo sang buying price amo ang alegasyon sang paglapta sang sakit sa baboy sa pila ka lugar, nga nagakinahanglan sang dugang nga laboratory testing kag sertipikasyon antes makadala sang baboy sa iban nga lugar.

Dugang pa niya, halos katunga sang mga hog raisers nga iya nakontak ang nag-untat ukon nagapamangkot na nga mag-untat sa negosyo bangud sa mataas nga gasto sa feeds kag nubo nga presyo sang baboy.

Nagalaum si Jaurigue nga mahatagan sang gilayon nga aksyon ang ila panawagan bangud nakasalalay sa hog-raising industry ang pangabuhian kag edukasyon sang ila mga kabataan.