KORONADAL CITY- Dako nga kadungganan ang dala sang 4 ka mga kadete nga naghalin sa rehiyon 12 kadungan sang ila nga paggradway subong nga adlaw bilang myembro sang Masidlak Class of 2017 bilang Top 10 Graduates sang Philippine National Police Academy na igapatigayon sa Gen. Cicero C. Campos Grandstand sa Silang, Cavite nga ginpangunahan ni Pres. Rodrigo Duterte.
Sa mensahe nga ginpalab-ot ni Michael Salendab Daunotan sa Bombo Radyo Koronadal, tuman ang ila pagpasalamat bangud sa pagkilala sa ila bilang Top 10 graduates sang PNPA nga magagradwar subong nga adlaw.
Madumduman nga halin sa rehiyon 12 ang class valedictorian nga si Cadet Macdum Enca nga naghalin sa Cotabato City nga nagpanguna sa 144 myembro sang Masidlak Class of 2017, yara naman sa ikaduha nga pwesto si Midzfar Omar sang Tawi-tawi nga isa ka Badjai, Janace Elcid Pascua Layug sang Tondo Manila sa ikatatlo nga pwesto, Juan Paulo Alday Porciuncula sang Sta. Maria, Bulacan sa ika apat nga pwesto, Harley Glenn Bacarro Galpo sang Cagayan de Oro City sa ikalima nga pwesto, Sailani Bacarat Armama sang Cagayan de Oro City sa ika anom nga pwesto, Michael Salendab Daunotan sang Tacurong, Sultan Kudarat sa ikapito nga pwesto, Ian Rey Canen Diolanto sang Polomolok, South Cotabato sa ika walo nga pwesto, Michael John Suniega Sentinta sang Isulan, Sultan Kudarat sa ika siyam nga pwesto kag Maysy Villaflor Cataquiz sang Quezon sa ika pulo nga pwesto.
Isa naman ka dako nga hangkat sa ila nga mga kadete kadungan sang ila pag gradwar ang pagbulig sa Pilipinas nga mapabilin ang kalinong usar ang ila natun-an sa akademya ilabi na nga kadamuan sa ila ang halin sa isla sang Mindanao.
