Ginpasiguro sang Department of Agriculture (DA) nga padayon nga protektado sang ahensya ang mga lokal nga produkto sang agrikultura pareho sang bugas, mais, asukar, manok, isda, kag baboy sa tunga sang ginahimo nga negosasyon sa taripa sa tunga sang Pilipinas kag Estados Unidos.
Suno kay DA Secretary Francisco Tiu Laurel Jr., pareho nga ginpabutyag nanday Secretary Frederick Go kag Trade Secretary Cristina Roque nga ang pinakauna nga prayoridad sang Pilipinas amo ang kaayuhan sang mga lokal nga mangunguma kag mangingisda.
Ini nga pahayag ang nagsunod matapos sang deklarasyon ni U.S. President Donald Trump nga kuno nag-uyon na ang Pilipinas sa 19% nga taripa sa mga export sini, kapalit sang duty-free nga pagpasulod sang produkto sang Amerika.
Madumduman nga ginpa-athag sang Malacañang nga wala pa sang pinal nga kasugtanan ang bahin sini.
Dugang pa sang DA, ginasiguro ni Secretary Go nga wala sang concession nga makadulot sang kadaut sa lokal nga industriya, kag dapat nga balanse ang kasugtanan sa tunga sang pagpalapad sang merkado kag proteksyon sa kabuhi-kabuhayan sang mga Pilipino.
