Ginkuha na sang House quad-committee (quad-comm) ang contempt kag detention orders nga ginpasaka batok kay anay presidential spokesperson Harry Roque, asawa niya nga si Mylah, kag anay presidential adviser Michael Yang.
Sang Lunes sang gab-i, Hunyo 9, opisyal nga ginpahunong sang special joint panel ang 11-ka bulan nga imbestigasyon nga ginahimo bilang bulig sa paghimo sang mga layi.
Kaangay man nga ginkakas ang contempt kag detention order batok kanday Police Colonel Hector Grijaldo kag Senior Police Officer 4 (SPO4) Arthur Narsolis.
Una na nga ginpanawagan ni Abang Lingkod Party-list Rep. Joseph Stephen Paduano, isa sa apat ka co-chairmen sang quad-comm, nga dapat kuhaon na ang contempt kag detention orders kanday Roque kag iban pa.
Ginsugtan kag gin-aprubahan ini sang quad-comm overall chairman nga si Surigao del Norte 2nd District Rep. Robert Ace Barbers.
Nagsugod ang pagbuo sang quad-comm agud pagkonektahon ang mga isyu parte sa Philippine Offshore Gaming Operators (POGO), extrajudicial killings (EJKs), money laundering, illegal nga druga, kag ang madugo nga kampanya kontra druga ni anay Presidente Rodrigo Duterte.
Duha ka beses nga gin-contempt sang quad-comm si Roque, una tungod sa pagpamaka bahin kay Cassandra Ong, isa ka representante sang POGO, kag ang kapaslawan niya sa paghatag sang mga dokumento nga may kaangtanan sa POGO operations sa Pampanga.
Halin sang nagligad nga tuig, naghalin na sa pungsod si Roque kag nagpangayo sang asylum sa Netherlands.
