Ginkwestyon ni Caloocan City 2nd District Representative Edgar Erice ang ginadugang nga P4.37 bilyon sa ginaproponer nga pondo para sa mga proyekto sa imprastraktura sa Ilocos Norte 1st District, nga ginarepresentar ni House Majority Leader Sandro Marcos.
Base sa datos sang isa ka budget watchdog, mas dako ang alokasyon para sa Ilocos Norte 1st District Engineering Office sa bersyon sang budget nga gin-aprobahan sang House of Representatives, kun ikumparar sa National Expenditure Program (NEP) nga ginpasa sang Department of Budget and Management.
Suno kay Erice, kinahanglan masiguro nga patas ang pagpanagtag sang pondo sang gobyerno sa tanan nga distrito.
Ginpamangkot man niya ang padayon nga dako nga alokasyon sa amo nga distrito halin pa sang 19th Congress.
Ginhangkat niya ang Senado nga usisaon kag repasuhon ang mga ginadudahan nga pagbag-o ukon mga “insertions” sa ginaproponer nga 2027 national budget agud masiguro nga ang pondo nagasunod sa husto nga proseso kag prayoridad sang pungsod.
Samtang, ginpahayag sang Malacañang nga kabahin sang responsibilidad sang mga kongresista ang pagpaninguha sang mga proyekto para sa pag-uswag sang ila mga distrito.
Apang, ginpahayag man sini nga kinahanglan masiguro nga nagakadto sa husto nga katuyuan ang pondo kag wala nagagamit sa mga ghost project ukon mga proyekto nga indi nagasunod sa nagakaigo nga kalidad.
