Lalong umiinit ang tensyon sa Senado matapos magpakawala ng matitinding pahayag si Alan Peter Cayetano laban sa ilang miyembro ng bagong mayorya, na inakusahan niyang labis na nakahanay umano sa interes ng administrasyon.
Sa isang fellowship lunch noong Biyernes, tinawag ni Cayetano sina Vicente Sotto III at Raffy Tulfo bilang mga “tuta” umano ng administrasyon ni Ferdinand Marcos Jr.. Idinawit din niya si Erwin Tulfo, na aniya’y sumusunod umano sa impluwensya ni Panfilo Lacson.
Hindi rin nakaligtas sa kanyang puna si Lacson, na kanyang tinawag na “aso,” na ayon kay Cayetano ay tumutukoy sa isang taong tagasunod at tagapagpatupad ng mga utos.
Agad namang tumugon si Lacson sa mga paratang at sinabing naaawa siya kay Cayetano dahil sa mga naging pahayag nito. Aniya, tila nahihirapan na umano ang dating Senate leader na tanggapin ang mga pangyayari sa Mataas na Kapulungan.
Sa hiwalay na reaksiyon, sinabi naman ni Sotto na hindi na dapat pagtuunan ng pansin ang mga pahayag ni Cayetano at hinikayat ang publiko na magpokus na lamang sa mas mahahalagang usapin para sa bansa.
Ang bangayan ay kasunod ng matagal nang alegasyon ni Cayetano na may impluwensya umano ang Malacañang sa naging pagbabago ng liderato sa Senado. Matatandaang ilang ulit niyang iginiit na nahati sa dalawang kampo ang Senado, kung saan ang isa ay sinasabing may suporta ng Palasyo.
Naging sentro rin ng usapin ang hindi natuloy na mungkahing “interim administrative arrangement” na iniharap noon ni Cayetano kay Sherwin Gatchalian.
Ang mga pahayag ay lumabas ilang araw matapos ang pormal na pagkakahalal kay Gatchalian bilang bagong Senate President noong Hunyo 17, kapalit ni Cayetano, isang hakbang na inaasahang magtatapos sa matagal na sigalot sa liderato ng Senado ngunit tila nagbukas naman ng panibagong yugto ng pampulitikang bangayan.
