KORONADAL CITY- Gintawag nga sapat ni Brgy. Rajahmuda, Tacurong City kapitan Doray Pauya ang pastor nga si Allan Dinapil makaligad man suno pa ini mabiktima sang Network Marketing Corporation investment scam.
Ini makaligad isa ang nasambit nga barangay kapitan nga ginatudlo nga benefactor sang investment group nga ginareklamo sang pila ka mga investors butang nga ginpanginwala naman sang nasambit nga opisyal kun sa diin ginpahayag pa sini sa Bombo Radyo nga siya isa man ka biktima makaligad mag invest sang P1 milyon bangud sa pagpangganyat sang pastor.
Gin-ako naman ni Pauya nga nagpalapit sa iya ang mga constituents kag nagpabulig sa iya agud maka-intra man sa NMC bangud luyag sang mga ini nga magmanggaranon rason nga naglab-ot sa P10 million ang kwarta nga na invest halin sa katawhan.
Makaligad ang pila bulan, nakaangkon na sang problema ang nasambit nga investment group tubtob sa wala na sang pay-out nga natabo.
Sa karon wala pa nag-atubang sa ila ang pastor samtang wala naman sang pahayag ang half brother sang pastor nga si Esperidion Sanchez nga founder sang NMC kun mabalik pa ang ila mga kwarta.
Bukas naman ang Bombo Radyo Koronadal sa bahin ni Pastor Dinapil agud mapa-athag ang iya bahin batok sa mga alegasyon nga ginahaboy sa iya.
