KORONADAL CITY-Hugot nga ginakondenar sang waragwagan sang Bombo Radyo Koronadal ang ginhimo nga pagpamahog sang isa ka opisyal sang Regional Police Drug Enforcement Unit sa reporter sang waragwagan sa tion sang pag-cover sang buybust operation nga nagluntad sa Brgy. Carpenter Hill.
Ginsita kag ginpaandaman sang wala pa natumod nga RPDEU officer si Bombo Bryan Belotindos nga igalakip suno pa siya sa drug watchlist bangud nakit-an lamang ang iya nawong sa Facebook live samtang naga-cover sa nasambit nga operasyon.
Apang gilayon naman nga nagpangayo sang pasaylo ang ground commander sa natabo.
Apang nasang-at na ni Bombo Bryan ang reklamo nga pagpamahog batok sa nasambit nga RPDEU official.
Abri man ang waragwagan agud makapaathag ini sa ginhimo nga pagpamahog.
