KORONADAL CITY – Nagtuga sang kalakasan ang natabo nga away sa tunga sang duha ka grupo sang pamilya sa Sitio Saboy, Brgy. Lunen, Tupi, South Cotabato bangud sa agaway sang duta.
Sa eksklusibo nga interbyu sang Bombo Radyo Koronadal kay Loreto Yaten, chairman sang Kaluhaco, sila suno pa ang may kinamatarong sa 120 ka ektarya sang duta sa nasambit nga lugar nga ginkuha suno pa sang Tanding family kag Balanon.
Suno kay Yaten, luyag nila nga makuha ang duta bangud sila suno pa ang mas may kinamataring didto nga ila ginapakigbato sa sulod na sang masobra 20 ka tuig.
Bangud sa natabo, nakigdayalogo si Tupi Mayor Reynaldo Tamayo sa mga ini agud nga makaangkon sang negosasyon kag matapos na ang problema.
Naglab-ot sa masobra isa ka oras ang pakig-istorya ni Mayor Tamayo sa mga nagaaway nga grupo kag nahisgutan nga liwat sila nga magadayalogo buwas agud nga magpresentar sang mga dokumento ang duha ka bahin.
Nahibaluan nga ang isa sa mga grupo sang IP’s nga nakig-away sa nasambit nga duta gikan sa banwa sang Banga, South Cotabato.
Luyag suno pa sang alkalde sang Tupi nga maghangpanay ang mga ini agud nga indi maglab-ot sa punto nga magadanak ang dugo kag may mapatay bangud sa land conflict.
