Ginpasalig sang opisyal sang Department of Agriculture nga ipauntat gilayon ni Secretary Francisco Tiu Laurel Jr. ang trial para sa African swine fever (ASF) vaccine pananglitan may makit-an nga mga problema.
Suno ini kay Assistant Secretary Arnel de Mesa, spokesperson sang ahensya, matapos ginpahayag ni former agriculture secretary Leonardo Montemayor nga dapat maghinay-hinay ang ahensya sa pagpatigayon sang trials sa sini nga bakuna.
Ang advice ni Montemayor ang kasunod man sang paandam sang World Organization for Animal Health (WOAH) sa mga pungsod batok sa paggamit sang substandard nga ASF vaccines agud matapna ang amo nga balatian sa baboy.
Una na nga ginpahayag ni Tiu Laurel nga aprubahan na sang Food and Drug Administration (FDA) subong nga bulan ang mangin labing-una nga vaccine sang Pilipinas batok sa ASF para sa commercial distribution.
Apang suno sa tiglikom, kasunod sang approval, magahimo anay ang ahensya sang mass trial para sa amo nga bakuna kun sa diin maga-conduct ang DA kag ang FDA sang controlled vaccination.
