Ginpanginwala sang Armed Forces of the Philippines (AFP) ang alegasyon nga kalabanan sang ila mga heneral ang nagahanda sa pagpasaka sang reklamo batok kay Defense Secretary Gilberto Teodoro Jr.
Sa briefing sa Camp Aguinaldo, ginpahayag ni Rear Admiral Roy Vincent Trinidad, tigpamaba sang Armed Forces of the Philippines para sa West Philippine Sea nga wala sang basehan ang amo nga pahayag kag isa lamang ini ka “biro” nga indi dapat seryosohon.
Ginpanginwala man ni Trinidad ang ginapahayag nga may tensyon sa tunga ni Teodoro kag sang liderato sang militar.
Nagguwa ang isyu matapos nga magpasaka sang reklamo nga perjury kag falsification ang isa ka abogado batok kay Teodoro may kaangtanan sa ginapaathag nga Maltese passport sini.
Gin-angkon man sang abogado nga may mga heneral suno pa nga nagaplano nga magpasaka sang pareho nga kaso.
Samtang, ginpahayag ni Colonel Francel Margareth Padilla tigpamaba sang Armed Forces of the Philippines nga indi magsapak ang AFP sa mga alegasyon nga wala sang basehan kag wala napat-ud.
Ginpunto niya nga nagapabilin nga propesyonal, disiplinado kag wala sang ginapaboran nga organisasyon ang AFP.
Dugang pa niya, padayon nga ginasuportahan sang AFP si Teodoro bilang Defense Secretary kag wala man sang ginahimo nga loyalty check sa hanay sang militar.
Una na nga nagpahayag ang Department of National Defense nga ang reklamo batok kay Teodoro nakabase lamang sa mga alegasyon nga wala pa naberipikar.
