Naglakip sang dugang nga pondo para sa mga sektor sang ikaayong lawas, edukasyon kag imprastraktura ang Senate Committee Report sa panukala nga pungsodnon nga badyet, suno kay Senate Finance Committee Chairperson JV Ejercito.
Sa sektor sang ikaayong lawas, dugang nga P52 bilyones ang ginpain, lakip na ang P19.8 bilyones para sa PhilHealth agud mapauswag ang serbisyo kag benepisyo nga mahatag sa mga miyembro sini.
May dugang man nga P9.6 bilyones para sa Department of Health (DOH) nga gamiton sa pagpaayo sang mga pasilidad, programa sa paglikaw sa balatian, pagbakuna kag iban pa nga serbisyo panglawas. Kabahin man sang prayoridad ang Zero Balance Billing para sa mga imol nga pasyente, persons with disabilities kag senior citizens.
Samtang, P15.3 bilyones ang dugang nga pondo para sa edukasyon, lakip ang P11 bilyones para sa programa sa pagpakaon sang mga estudyante, dugang nga pondo para sa mga pampubliko nga unibersidad kag kolehiyo, kag P850 milyones para sa SUC Smart Campus Program.
Sa bahin sang imprastraktura, ginbalik man ang P68.797 bilyones nga pondo para sa mga proyekto nga ginabuligan sang dumuluong, lakip ang Metro Manila Subway, North-South Commuter Railway, Cavite-Bataan Bridge kag Laguna Lakeshore Highway.













