Nagaplano ang nagkalain-lain nga grupo sang local hog raisers sa bug-os nga rehiyon nga magpatigayon sang protesta bilang suporta sa mga hog raisers sa banwa sang Tupi sa ila panawagan nga magpagwa sang Executive Order ang lokal nga panguluhan para sa floorprice sang buhi nga baboy.
Sa interview sang Bombo Radyo Koronadal, ginpahayag ni Arthur Jaurigue, leader sang Hog Raisers Tupi, nga ginaplano ang pagtililipon matapos ang wala sang kasiguruhan nga resulta sang dayalogo sa tunga sang mga hog raisers kag sang lokal nga gobyerno sang Tupi.
Suno kay Jaurigue, paagi sa protesta, tinguhaan nila nga mas mabatian sang alkalde ang ila panawagan kag makuha ang suporta sang lokal nga gobyerno para sa ila industriya.
Ginpabutyag man niya nga indi ayuda, pinansyal nga bulig ukon livelihood assistance ang ila ginapangayo, bangud ang pag-sagod sang baboy amo na mismo ang ila panguna nga palangabuhian.
Sa baylo, ang ila ginapanawagan amo ang konkreto nga suporta kag aksyon halin sa lokal nga gobyerno, ilabi na sa pagpatuman sang polisiya nga makabulig sa pagpanalipod sang presyo sang buhi nga baboy kag sa pangabuhian sang mga hog raisers.













