-- ADVERTISEMENT --

Nagapanawagan sang aksyon kay Sultan Kudarat Governor Datu Pax Ali Mangudadatu ang mga hog raisers sa Esperanza, Sultan Kudarat agud makapagwa sang Executive Order (EO) nga magapatuman sang P140 tubtob P150 kada kilo nga buying price sang buhi nga baboy bangud sa padayon nga kalugian sa ila pangabuhian.

Sa interview sang Bombo Radyo Koronadal ginpahayag ni Rosa Mae Taliga Edjan, vice president sang Esperanza Livestock Growers Association, nga nagapadayon ang ila pag-atubang sa mataas nga presyo sang feeds kag iban nga production expenses, samtang nubo ang presyo sang ila mga baboy sa merkado.

Ginpahayag ni Edjan nga may pila na ka hog raisers nga nagdesisyon nga ibaligya ang ila mga nayon nga baboy, samtang ang iban nagapadali na lamang sa pagpatambok sang baboy agud malikawan ang dugang nga gasto.

Nauna na sila nga nagpasa sang appeal sa Sangguniang Bayan sang Esperanza kag Sangguniang Panlalawigan sang Sultan Kudarat, apang nagahulat pa sang aksyon halin sa mga opisyal.

Ginkonsiderar man sang asosasyon ang pagpatindog sang kaugalingon nga meat shop agud direkta nga mabaligya sang mga miyembro ang ila mga baboy kon wala gihapon sang solusyon sa ila panawagan. Samtang, ginpahayag ni Edjan nga nagapakita sang intensyon si Mayor Charles Federic R. Ploteña nga makig-angot sa Office of the Provincial Veterinarian kag provincial government agud matalakay ang problema.

Ginpabutyag ni Edjan nga indi pinansyal nga ayuda ang ila ginapangayo kundi suporta paagi sa pagpatuman sang P140-P150 nga buying price agud makabawi sa puhunan kag mapadayon ang hog-raising industry nga ginakabuhian sang madamo nga pamilya sa Esperanza, Sultan Kudarat.