-- ADVERTISEMENT --

Sa baylo nga kilig kag romantic nga wedding photos ang ma-capture sang kamera, daw aksidente pa nga nag-“take off” ang isa ka bride sa Istanbul, Turkey, matapos siya halos paluparon sang mabaskog nga hangin samtang nagapakuha sang laragway!

Agud mas mangin bongga ang iya prenup photoshoot, nagbitbit ang bride sang bouquet sang dalagko nga beige balloons.

Apang wala ginpaabot nga ang hangin mismo ang mangin kontrabida sa ila photoshoot.

Gulpi nga nagkusog ang huyop sang hangin kag ginlupad ang mga balloons, nga daw gusto na kuhaon pati ang bride pakadto sa seawall!Sa video, makita nga nagapangapkap kag nagapa-atras ang bride agud indi madala sang hangin.

Maayo na lang kag madasig nga nakalab-ot ang photographer kag nasalo siya antes pa mabunggo sa building.

Bisan daw lapit na mangin flight attendant sa iya wedding shoot, natapos man gihapon ang photoshoot nga wala sang dugang nga insidente.

Isa naman ka netizen ang nagkomento nga daw indi gid pagpabay-an sang bride ang iya mga balloons.

Sa ulihi, indi lang love story ang ila madumduman sa sini nga photoshoot, kundi pati ang bride nga hapitan na mangin first-class passenger nga wala nagbakal sang tiket!