Gindayaw ni United States President Donald Trump si Presidente Ferdinand Marcos Jr. matapos ang malampuson nga pagdumala sang Pilipinas sa 49th ASEAN Summit.
Sa ginpatigayon nga banquet dinner nga gintambungan sang nagkalain-lain nga mga lider sang kalibutan, personal nga ginabi-abi ni Trump si Marcos kag ginpahayag ang iya pagdayaw sa pag-host sang Pilipinas sa amo nga summit.
Ginpaathag man sang lider sang Estados Unidos ang iya paghanga kay Ilocos Norte Representative Sandro Marcos, nga nagsugata sa iya pag-abot sa Villamor Airbase.
Ginlahog pa ni Trump nga daw yara na sa dugo sang pamilya Marcos ang pagkamatinlo sa pagdumala kag pagkilala, bangud nakilala man niya sang personal ang amay sang presidente nga si anay Pangulong Ferdinand Marcos Sr.
Dugang pa sini, ginpangabay ni Trump kay Marcos nga ipabalo sa ila, paagi kay US Secretary of State Marco Rubio, kun may kinahanglanon ukon bulig ang Pilipinas halin sa Estados Unidos.
Sa tunga sang ila pag-istoryahanay, nag-joke pa ang US President nga iya pagasikwayon sa puwesto si Rubio kun indi sini hatagan sang atensyon ang pangabay ni Marcos.
Samtang, ginapaabot ang bilateral meeting nanday Trump kag Marcos sa tion sang ila pagtambong sa masunod nga APEC Summit nga pagahiwaton sa China, agud mapalig-on pa ang relasyon kag kooperasyon sang duha ka pungsod.













