-- ADVERTISEMENT --

Nagapangasubo ang komunidad sang boxing matapos kumpirmahon ang pagtaliwan sang Irish boxer nga si Lee “El Champo” Reeves, nga pila ka bulan nga nagpakigbato sa iya kabuhi matapos ang mabaskog nga pagka-out sa isa ka boxing match sa Dublin, Ireland sang Agosto 1.

Nag-atubang si Reeves kay Gary Cully sa sambuwa para sa BUI Celtic Light-Welterweight title.

Apang, nagtakop ang iya kampanya sa ika-10 nga round matapos siya mapuruhan sang duha ka beses.

Gilayon siya gindala sa ospital kag gin-operahan bangud sa malala nga pilas nga iya naangkon.

Ginsulod man siya sa medically induced coma samtang ginatipigan ang iya kondisyon.

Bangud sini, nagpaabot sang ila pagpangasubo kag pagpasidungog ang iya coach nga si Jonathan O’Brien kag ang iya katapusan nga kontra nga si Cully.

Ginpabutyag nila ang pagdayaw sa kaisog kag maayo nga pagkatawo sang boksingero.

Luwas sa iya karera sa boxing, nangin aktibo man si Reeves sa pagpalapnag sang paghangop parte sa mental health kag nagserbi nga ambassador sang Limerick Treaty Suicide Prevention group.