Ginklaro sang City Anti-Drug Abuse Council (CADAC) nga ang deklarasyon nga drug-free kag drug-cleared ang isa ka barangay indi nagakahulugan nga permanente na ini nga status.
Sa interview sang Bombo Radyo Koronadal, ginpahayag ni Jerome Atangan, Focal Point Specialist kag Administrative Officer sang CADAC, nga mahimo magbag-o ang status sang barangay depende sa sitwasyon kag pagmonitor sa presensya sang ilegal nga droga.
Madumduman nga sang 2022, may 21 ka barangay sa syudad ang gindeklarar nga drug-cleared kag drug-free, lakip ang Barangay Assumption.
Apang suno kay Atangan, siyam na lamang ka barangay ang nakapabilin sa amo nga status subong nga 2026.
Ginkilala man niya nga isa ka dako nga hangkat para sa lokal nga gobyerno ang padayon nga pagtapna sa ilegal nga droga.
Bisan pa sini, padayon ang panikasog sang mga otoridad kag sang lokal nga gobyerno agud mapabilin nga malinong kag mangin drug-free ang bug-os nga syudad.













